Bashir Badr 1

Bhashir Badr - Ghazal 1

uska bhi kuchh haq hai aakhir
usne mujhse nafarat ki hai

ultimately she also has a right over me
since she has hated me so

jaise sadiyan beet chuki hon
phir bhi aadhi raat abhi hai

it seems like ages have passed
and yet still half a night has to pass

kaise kategi tanha tanha
itni sari umr pari hai

how will it pass in such loneliness
this long, long life still before me

ham donon ki khoob nibhegi
mein bhi dukhi hoon voh bhi dukhi hai

we both will be very happy together
because i am also sad and she is also sad

ab gham se kiya naata toren
zalim bachpan ka sathi hai

why to break my relation with sorrow
it has always been my companion since childhood


____________________________________________________________________________________________________________________________

Bashir Badr - Ghazal 2

kisne ne mujhko sada di bata kaun hai
ai hawa tere ghar mein chhupa kaun hai

who called me tell me who it is
o wind who hides in your abode

baarishon mein kisi ped ko dekhana
shaal odhhe hue bhigata kaun hai

look at any tree when it rains
covered with shawl who is getting wet

khushbooyon mein nahayi huyi shaakh par
phool sa muskarata kaun hai

on the branch drenched with fragrance
like a smiling flower who is that one

dil ko patthar huye zamana hua
is makan mein magar bolta kaun hai

the heart turned into a stone long ago
but who speaks in this dwelling now

tum bhi majboor ho ham bhi malboor hein
bewafa kaun hai bawafa kaun hai

you are choiceless, i am also choiceless
who is disloyal, who is loyal


____________________________________________________________________________________________________________________________

Bashir Badr -Ghazal 3

mohabbaton mein dikhawe ki dosti na mila
agar gale nahin milta to haath bhi na mila

do not mix false friendship and affection
if you can't embrace me, do not shake hands with me either

ghar pe naam the naamon ke saath audhe the
bahut taalaash kiya koyi aadmi na mila

houses had names names were with titles
i searched a lot but failed to find a human being

tamaam rishton ko mein ghar mein chhor aaya tha
phir iske baad mujhe koyi ajnabi na mila

i had left behind at home all relationships
after that i did not find anyone a stranger

khuda ki itni bari qayenaat mein maine
bas aik shakhs ko maanga mujhe wahi na mila

in god's whole big world
i asked for only one person, i could not get her even


____________________________________________________________________________________________________________________________


Bashir Badr -Ghazal 4


aa chaa.Ndanii bhii merii tarah jaag rahii hai
palako.n pe sitaaro.n ko liye raat kha.Dii hai

ye baat ki suurat ke bhale dil ke bure ho.n
allaah kare jhuuTh ho bahuto.n se suunii hai

vo maathe kaa matalaa ho ki ho.nTho.n ke do misare
bachapan kii Gazal hii merii mahabuub rahii hai

Gazalo.n ne vahii.n zulfo.n ke phailaa diye saaye
jin raaho.n pe dekhaa hai bahut dhuup ka.Dii hai

ham dillii bhii ho aaye hai.n laahaur bhii ghume
ai yaar magar terii galii terii galii hai

[laahaur =Lahore]


____________________________________________________________________________________________________________________________

aa chaa.Ndanii bhii merii tarah jaag rahii hai
Bashir Badr


aa chaa.Ndanii bhii merii tarah jaag rahii hai
palako.n pe sitaaro.n ko liye raat kha.Dii hai

ye baat ki suurat ke bhale dil ke bure ho.n
allaah kare jhuuTh ho bahuto.n se suunii hai

vo maathe kaa matalaa ho ki ho.nTho.n ke do misare
bachapan kii Gazal hii merii mahabuub rahii hai

Gazalo.n ne vahii.n zulfo.n ke phailaa diye saaye
jin raaho.n pe dekhaa hai bahut dhuup ka.Dii hai

ham dillii bhii ho aaye hai.n laahaur bhii ghume
ai yaar magar terii galii terii galii hai

[laahaur =Lahore]




____________________________________________________________________________________________________________________________




aa.Nsuuo.n kii jahaa.N paayamaalii rahii
Bashir Badr



aa.Nsuuo.n kii jahaa.N paayamaalii rahii
aisii bastii charaaGo.n se Khaalii rahii

dushmano.n kii tarah us se la.Date rahe
apanii chaahat bhii kitanii niraalii rahii

jab kabhii bhii tumhaaraa Khayaal aa gayaa
phir ka_ii roz tak beKhayaalii rahii

lab tarasate rahe ik ha.Nsii ke liye
merii kashtii musaafir se Khaalii rahii

chaa.Nd taare saabhii ham-safar the magar
zindagii raat thii raat kaalii rahii

mere siine pe Khushbuu ne sar rakh diyaa
merii baa.Nho.n me.n puulo.n kii Daalii rahii



____________________________________________________________________________________________________________________________



aas hogii na aasaraa hogaa
Bashir Badr



aas hogii na aasaraa hogaa
aane vaale dino.n me.n kyaa hogaa

mai.n tujhe bhuul jaauu.Ngaa ik din
vaqt sab kuchh badal chukaa hogaa

naam ham ne likhaa thaa aa.Nkho.n me.n
aa.nsuuo.n ne miTaa diyaa hogaa

aasamaa.N bhar gayaa pari.ndo.n se
pe.D ko_ii haraa giraa hogaa

kitanaa dushvaar thaa safar us kaa
vo sar-e-shaam so gayaa hogaa

[sar-e-shaam=as the evening approached (shaam hote hii)]


____________________________________________________________________________________________________________________________




ab kise chaahe.n kise Dhuu.NDhaa kare.n
Bashir Badr



ab kise chaahe.n kise Dhuu.NDhaa kare.n
vo bhii aaKhir mil gayaa ab kyaa kare.n
halkii halkii baarishe.n hotii rahe.n
ham bhii phuulo.n kii tarah bhiigaa kare.n
aa.Nkh muu.Nde us gulaabii dhuup me.n
der tak baiThe use sochaa kare.n
dil muhabbat diin duniyaa shaayarii
har dariiche se tujhe dekhaa kare.n
ghar nayaa kapa.De naye bartan naye
in puraane kaaGazo.n kaa kyaa kare.n




____________________________________________________________________________________________________________________________




abhii is taraf na nigaah kar mai.n Gazal ke palke.n sa.Nvaar luu.N
Bashir Badr



abhii is taraf na nigaah kar mai.n Gazal ke palke.n sa.Nvaar luu.N
meraa lafz lafz ho aa_iinaa tujhe aa_iine me.n utaar luu.N

mai.n tamaam din kaa thakaa huaa tuu tamaam shab kaa jagaa huaa
zaraa Thahar jaa isii mo.D par tere saath shaam guzaar luu.N

agar aasamaa.N kii numaa_isho.n me.n mujhe bhii izn-e-qayaam ho
to mai.n motiyo.n kii dukaan se terii baaliyaa.N tere haar luu.N

[izn-e-qaayam=command to stop]

ka_ii ajanabii terii raah ke mere paas se yuu.N guzar gaye
ji.nhe.N dekh kar ye ta.Dap hu_ii teraa naam leke pukaar luu.N



____________________________________________________________________________________________________________________________



agar talaash karuu.N ko_ii mil hii jaayegaa
Bashir Badr



agar talaash karuu.N ko_ii mil hii jaayegaa
magar tumhaarii tarah kaun mujhe chaahegaa
tumhe.n zaruur ko_ii chaahato.n se dekhegaa
magar vo aa.Nkhe.n hamaarii kahaa.N se laayegaa
naa jaane kab tere dil par na_ii sii dastak ho
makaan Khaalii huaa hai to ko_ii aayegaa
mai.n apanii raah me.n diivaar ban ke baiThaa huu.N
agar vo aayaa to kis raaste se aayegaa
tumhaare saath ye mausam farishto.n jaisaa hai
tumhaare baad ye mausam bahut sataayegaa


____________________________________________________________________________________________________________________________



ai husn-e-be-paravaah tujhe shabnam kahuu.N sholaa kahuu.N
Bashir Badr



ai husn-e-be-paravaah tujhe shabnam kahuu.N sholaa kahuu.N
phuulo.n me.n bhii shoKhii to hai kisako magar tujh saa kahuu.N
gesuu u.De mahakii fizaa jaduu kare.n aa.Nkhe terii
soyaa huaa ma.nzar kahuu.N yaa.N jaagataa sapanaa kahuu.N
cha.ndaa kii tuu hai chaa.Ndanii laharo.n kii tuu hai raaginii
jaan-e-tamannaa mai.n tujhe kyaa kyaa kahuu.N kyaa na kahuu.N



____________________________________________________________________________________________________________________________


aisaa lagataa hai zindagii tum ho
Bashir Badr



aisaa lagataa hai zindagii tum ho
ajanabii jaise ajanabii tum ho
ab ko_ii aarazuu nahii.n baakii
justajuu merii aaKhirii tum ho
mai.n zamii.n par ghanaa a.Ndheraa huu.N
aasamaano.n kii chaa.Ndanii tum ho
dosto.n se vafaa kii ummiide.n
kis zamaane ke aadamii tum ho


____________________________________________________________________________________________________________________________



bhiigii hu_ii aa.Nkho.n kaa ye ma.nzar na milegaa
Bashir Badr


bhiigii hu_ii aa.Nkho.n kaa ye ma.nzar na milegaa
ghar chho.D ke mat jaao kahii.n ghar na milegaa

phir yaad bahur aayegii zulfo.n kii ghanii shaam
jab dhuup me.n saayaa ko_ii sar par na milegaa

aa.Nsuu ko kabhii os kaa qataraa na samajhanaa
aisaa tumhe.n chaahat kaa samu.ndar na milegaa

is Khvaab ke maahaul me.n be-Khvaab hai.n aa.Nkhe.n
baazaar me.n aisaa ko_ii zevar na milegaa

ye soch lo ab aaKhirii saayaa hai muhabbat
is dar se uthoge to ko_ii dar na milegaa


____________________________________________________________________________________________________________________________



bhuul shaayad bahut ba.Dii kar lii
Bashir Badr


bhuul shaayad bahut ba.Dii kar lii
dil ne duniyaa se dostii kar lii

tum muhabbat ko khel kahate ho
ham ne barbaad zindagii kar lii

us ne dekhaa ba.Dii inaayat se
aa.Nkho.n aa.Nkho.n me.n baat bhii kar lii

aashiqii me.n bahut zaruurii hai
bevafaa_ii kabhi kabhii kar lii

ham nahii.n jaanate chiraaGo.n ne
kyo.n a.ndhero.n se dostii kar lii

dha.Dakane.n dafn ho ga_ii ho.ngii
dil me.n diivaar kyo.n kha.Dii kar lii



____________________________________________________________________________________________________________________________


duaa karo ki ye paudhaa sadaa haraa hii lage


duaa karo ki ye paudhaa sadaa haraa hii lage
udaasiyo.n se bhii cheharaa khilaa-khilaa hii lage

ye chaa.Nd taaro.n kaa aa.Nchal usii kaa hissaa hai
ko_ii jo duusaraa o.De to duusaraa hii lage

nahii.n hai mere muqaddar me.n raushanii na sahii
ye khi.Dakii kholo zaraa subah kii havaa hii lage

ajiib shaKhs hai naaraaz hoke ha.nsataa hai
mai.n chaahataa huu.N Khafaa ho to vo Khafaa hii lage

nahii.n hai mere muqaddar me.n raushanii na sahii
ye khi.Dakii kholo zaraa subah kii havaa to lage


____________________________________________________________________________________________________________________________


duusaro.n ko hamaarii sazaaye.n na de
Bashir Badr



duusaro.n ko hamaarii sazaaye.n na de
chaa.ndanii raat ko bad-duaaye.n na de

phuul se aashiqii kaa hunar siikh le
titaliyaa.N Khud ruke.ngii sadaaye.n na de

sab gunaaho.n kaa iqaraar karane lage.n
is qadar Khubasuurat sazaaye.n na de

motiyo.n ko chhupaa siipiyo.n kii tarah
bevafaao.n ko apanii vafaaye.n na de

mai.n bikhar jaa_uu.Ngaa aa.Nsuuo.n kii tarah
is qadar pyaar se bad-duaaye.n na de



____________________________________________________________________________________________________________________________


ek cheharaa saath saath rahaa jo milaa nahii.n
Bashir Badr



ek cheharaa saath saath rahaa jo milaa nahii.n
kisako talaash karate rahe kuchh pataa nahii.n
shiddat kii dhuup tez havaao.n ke baavajuud
mai.n shaaKh se giraa huu.N nazar se giraa nahii.n
aaKhir Gazal kaa taajamahal bhii hai makabaraa
ham zindagii the hamako kisii ne jiyaa nahii.n
jisakii mukhaalafat hu_ii mashahuur ho gayaa
in pattharo.n se ko_ii pari.ndaa giraa nahii.n
taariikiyo.n me.n aur chamakatii hai dil kii dhuup
suuraj tamaam raat yahaa.n Duubataa nahii.n
kisane jalaa_ii bastiyaa.N baazaar kyo.n luTe
mai.n cha.Nd par gayaa thaa mujhe kuchh pataa nahii.n



____________________________________________________________________________________________________________________________


gaa.Nv miT jaayegaa shahar jal jaayegaa


gaa.Nv miT jaayegaa shahar jal jaayegaa
zindagii tera cheharaa badal jaayegaa

kuchh likho marsiyaa masanavii yaa Gazal
ko_ii kaaGaz ho paanii me.n gal jaayegaa

ab usii din likhuu.Ngaa dukho.n kii Gazal
jab meraa haath lohe me.n Dhal jaayegaa

mai.n agar muskuraa kar unhe.n dekh luu.N
qaatilo.n kaa iraadaa badal jaayegaa

aaj suuraj kaa ruKh hamaarii taraf
ye badan mom kaa hai pighal jaayegaa



____________________________________________________________________________________________________________________________


Gam chhupaate rahe muskuraate rahe



Gam chhupaate rahe muskuraate rahe
mahafilo.n mahafilo.n gun_gunaate rahe

aa.Nsuo.n se likhii dil kii tahariir ko
phuul kii pattiyo.n se sajaate rahe

Gazale.n kumhalaa ga_ii.n nazme.n murjhaa ga_ii.n
giit sa.Nvalaa gaye saaz chup ho gaye

phir bhii ahal-e-chaman kitane Khush_zauq the
naGmaa-e-fasl-e-gul gun_gunaate rahe

terii saa.Nso.n kii Khushbuu labo.n kii mahak
jaane kaise havaaye.n u.Daa laa_ii.n thii

vaqt kaa har qadam bhii bahakataa rahaa
zaqt le paa.Nv bhii Dag_magaate rahe


____________________________________________________________________________________________________________________________


Gam chhupaate rahe muskuraate rahe



Gam chhupaate rahe muskuraate rahe
mahafilo.n mahafilo.n gun_gunaate rahe

aa.Nsuo.n se likhii dil kii tahariir ko
phuul kii pattiyo.n se sajaate rahe

Gazale.n kumhalaa ga_ii.n nazme.n murjhaa ga_ii.n
giit sa.Nvalaa gaye saaz chup ho gaye

phir bhii ahal-e-chaman kitane Khush_zauq the
naGmaa-e-fasl-e-gul gun_gunaate rahe

terii saa.Nso.n kii Khushbuu labo.n kii mahak
jaane kaise havaaye.n u.Daa laa_ii.n thii

vaqt kaa har qadam bhii bahakataa rahaa
zaqt le paa.Nv bhii Dag_magaate rahe




____________________________________________________________________________________________________________________________


hoTho.n pe muhabbat ke fasaane nahii.n aate
Bashir Badr


hoTho.n pe muhabbat ke fasaane nahii.n aate
saahil pe samu.ndar ke Khazaane nahii.n aate

palake.n bhii chamak uThatii hai.n sote me.n hamaarii
aa.Nkho.n ko abhii Khvaab chhupaane nahii.n aate

dil uja.Dii hu_ii ik saraaye kii tarah hai
ab log yahaa.N raat jagaane nahii.n aate

u.Dane do pari.ndo.n ko abhii shoKh havaa me.n
phir lauT ke bachapan ke zamaane nahii.n aate

[pari.ndo.n=birds]

is shahar ke baadal terii zulfo.n kii tarah hai.n
ye aag lagaate hai.n bujhaane nahii.n aate

ahabaab bhii Gairo.n kii adaa siikh gaye hai.n
aate hai.n magar dil ko dukhaane nahii.n aate

[ahabaab=friends]





____________________________________________________________________________________________________________________________


jahaa.N pe.D par chaar daane lage
Bashir Badr



jahaa.N pe.D par chaar daane lage
hazaaro.n taraf se nishaane lage
hu_ii shaam yaado.n ke ik gaa.Nv me.n
pari.nde udaasii ke aane lage
gha.Dii do gha.Dii mujhako palako.n pe rakh
yahaa.N aate aate zamaane lage
kabhii bastiyaa.N dil kii yuu.N bhii basii.n
dukaane.n khulii.n, kaaraKhaane lage
vahii.n zard patto.n kaa kaaliin hai
gulo.n ke jahaa.N shaamiyaane lage
pa.Daa_ii likhaa_ii kaa mausam kahaa.N
kitaabo.n me.n Khat aane-jaane lage


____________________________________________________________________________________________________________________________

kabhii to aasmaa.N se chaa.nd utare jaam ho jaaye
Bashir Badr



kabhii to aasmaa.N se chaa.nd utare jaam ho jaaye
tumhaare naam kii ik Khuubasuurat shaam ho jaaye
hamaaraa dil savere kaa sunaharaa jaam ho jaaye
charaaGo.n kii tarah aa.Nkhe.n jale.n jab shaam ho jaaye
ajab haalaat the yuu.N dil kaa saudaa ho gayaa aakhir
mohabaat kii havelii jis tarah niilaam ho jaaye
sama.ndar ke safar me.n is tarah aavaaz do hamako
havaaye.N tez ho.n aur kashtiyo.n me.n shaam ho jaaye
mai.n Khud bhii ehatiyaatan us galii se kam guzarataa huu.N,
ko_ii maasuum kyo.n mere liye badanaam ho jaaye
mujhe maaluum hai us kaa Thikaana phir kahaa.N hogaa
pari.ndaa aasmaa.N chhuune me.n jab naaqaam ho jaaye
ujaale apanii yaado.n ke hamaare saath rahane do
na jaane kis galii me.n zindagii kii shaam ho jaaye

____________________________________________________________________________________________________________________________


kabhii yuu.N bhii aa merii aa.Nkh me.n ke merii nazar ko Khabar na ho
Bashir Badr



kabhii yuu.N bhii aa merii aa.Nkh me.n ke merii nazar ko Khabar na ho
mujhe ek raat navaaz de magar uske baad sahar na ho
[navaaz - to grant]
vo ba.Daa rahiim-o-kariim hai mujhe ye sifat bhii ataa kare
tujhe bhuulane kii duaa karuu.N to duaa me.n merii asar na ho
[rahiim-o-kariim - kind & generous; sifat - talent]
mere baazuo.n me.n thakii thakii , abhii mahav-e-Khvaab hai chaa.Ndanii
na uThe sitaaro.n kii paalakii, abhii aahaTo.n kaa guzar na ho
ye Gazal ki jaise hiran kii aa.Nkho.n me.n pichhalii raat kii chaa.Ndanii
na bujhe Kharaabe kii roshanii, kabhii becharaaG ye ghar na ho
vo firaaq ho yaa visaal ho, terii yaad mahakegii ek din
vo gulaab ban ke khilegaa kyaa, jo chiraaG ban ke jalaa na ho
kabhii dhuup de, kabhii badaliyaa.N, dil-o-jaa.N se dono.n qubuul hai.n
magar us nagar me.n na qaid kar jahaa.N zindagii kii havaa na ho
kabhii din kii dhuup me.n jhuum ke kabhii shab ke phuul ko chuum ke
yuu.N hii saath saath chale.n sadaa kabhii Khatm apanaa safar na ho
[shab - night]
mere paas mere habiib aa zaraa aur dil ke qariib aa
tujhe dha.Dakano.n me.n basaa luu.N mai.n ke bichha.Dane kaa kabhii Dar na ho
[habiib - beloved]


____________________________________________________________________________________________________________________________


kahaa.N aa.Nsuuo.n kii ye sauGaat hogii
Bashir Badr



kahaa.N aa.Nsuuo.n kii ye sauGaat hogii
naye log ho.nge na_ii baat hogii

mai.n har haal me.n muskuraataa rahuu.Ngaa
tumhaarii muhabbat agar saath hogii

charaaGo.n ko aa.Nkho.n se mahafuus rakhanaa
ba.Dii duur tak raat hii raat hogii

[mahafuus=safe]

musaafir hai.n ham bhii musaafir ho tum bhii
kisii mo.D pe phir mulaaqaat hogii

____________________________________________________________________________________________________________________________

kahii.n chaa.Nd raaho.n me.n kho gayaa kahii.n chaa.Ndanii bhii bhaTak ga_ii
Bashir Badr


kahii.n chaa.Nd raaho.n me.n kho gayaa kahii.n chaa.Ndanii bhii bhaTak ga_ii
mai.n charaaG vo bhii bujhaa huaa merii raat kaise chamak ga_ii

merii daastaa.N kaa uruuj thaa terii narm palako.n kii chhaa.Nv me.n
mere saath thaa tujhe jaaganaa terii aa.Nkh kaise jhapak ga_ii

kabhii ham mile to bhii kyaa mile vahii duuriyaa.N vahii faasale
na kabhii hamaare qadam ba.Dhe na kabhii tumhaarii jhijhak ga_ii

tujhe bhuul jaane kii koshishe.n kabhii qaamayaab na ho sakii.n
terii yaad shaaKh-e-gulaab hai jo havaa chalii to lachak ga_ii


____________________________________________________________________________________________________________________________


kaun aayaa raaste aaiinaaKhaane ho gae
Bashir Badr



kaun aayaa raaste aaiinaaKhaane ho gae
raat raushan ho gaii din bhii suhaane ho gae
kyo.n havelii ke uja.Dane kaa mujhe afasos ho
saika.Do.n beghar pari.ndo.n ke Thikaane ho gae
ye bhii mumkin hai ke usane mujhako pahachaanaa na ho
ab use dekhe hue kitane zamaane ho gae
jaao un kamaro.n ke aaiine uThaakar phe.nk do
ve agar ye kah rahe.n ho ham puraane ho gae
merii palako.n par ye aa.Nsuu pyaar kii tauhiin hai
unakii aa.Nkho.n se gire motii ke daane ho gae


____________________________________________________________________________________________________________________________

Khudaa ham ko aisii Khudaa_ii na de
Bashir Badr



Khudaa ham ko aisii Khudaa_ii na de
ki apane sivaa kuchh dikhaa_ii na de
Khataavaar samajhegii duniyaa tujhe
ab itanii bhii zyaadaa safaa_ii na de
[Khataavaar=guilty]

ha.Nso aaj itanaa ki is shor me.n
sadaa sisakiyo.n kii sunaa_ii na de
abhii to badan me.n lahuu hai bahut
kalam chiin le raushanaa_ii na de
mujhe apanii chaadar se yuu.N Dhaa.Np lo
zamii.n aasamaa.N kuchh dikhaa_ii na de
Gulaamii ko barakat samajhane lage.n
asiiro.n ko aisii rihaa_ii na de
[barakat=blessing; asiiro.n=prisoners; rihaa_ii=freedom]

mujhe aisii jannat nahii.n chaahe
jahaan se madiinaa dikhaa_ii na de

mai.n ashko.n se naam-e-muhammad likhuu.N
qalam chhiin le raushanii na de

abhii to badan me.n lahuu hai bahut
qalam chhiin le roshanaa_ii na de

Khudaa aise irfaan kaa naam hai
rahe saamane aur dikhaa_ii na de

____________________________________________________________________________________________________________________________