Bashir Badr 2

Khush rahe yaa bahut udaas rahe
Bashir Badr



Khush rahe yaa bahut udaas rahe
zindagii tere aas paas rahe

chaa.Nd in badaliyo.n se nikalegaa
ko_ii aayegaa dil ko aas rahe

ham muhabbat ke phuul hai.n shaayad
ko_ii kaa.NTaa bhii aas paas rahe

mere siine me.n is tarah bas jaa
merii saa.nso.n me.n terii baas rahe

aaj ham sab ke saath Khuub ha.Nse
aur phir der tak udaas rahe

____________________________________________________________________________________________________________________________


Khushbuu kii tarah aayaa vo tez havaao.n me.n
Bashir Badr


Khushbuu kii tarah aayaa vo tez havaao.n me.n
maa.Ngaa thaa jise ham ne din raat duaao.n me.n

tum chhat par nahii.n aaye mai.n ghar se nahii.n nikalaa
ye chaa.Nd bahut laTakaa saavan ki ghaTaao.n me.n

is shahar me.n ik la.Dakii bilkul hai Gazal jaisii
phuulo.n kii badan vaalii Khushbuu sii adaao.n me.n

duniyaa kii tarah vo bhii ha.Nsate hai.n muhabbat par
Duube huye rahate the jo log vafaao.n me.n

____________________________________________________________________________________________________________________________


Khvaab is aa.Nkho.n se ab ko_ii churaa kar le jaaye
Bashir Badr


Khvaab is aa.Nkho.n se ab ko_ii churaa kar le jaaye
qabr ke suukhe huye phuul uThaa kar le jaaye

mu.ntazir phuul me.n Khushbuu kii tarah huu.N kab se
ko_ii jho.nke.n kii tarah aaye u.Daa kar le jaaye

[mu.ntazir=waiting]

ye bhii paanii hai magar aa.Nkho.n kaa aisaa paanii
jo hathelii pe rachii meha.ndii u.Daa kar le jaaye

mai.n mohabbat se mahakataa huaa Khat huu.N mujh ko
zindagii apanii kitaabo.n me.n dabaa kar le jaaye

Khaak i.nsaaf hai naabiinaa buto.n ke aage
raat thaalii me.n chiraaGo.n ko sajaa kar le jaaye

[naabiinaa=blind]


____________________________________________________________________________________________________________________________

kis ne mujhako sadaa dii bataa kaun hai
Bashir Badr


kis ne mujhako sadaa dii bataa kaun hai
ai havaa tere ghar me.n chhupaa kaun hai

baarisho.n me.n kisii pe.D ko dekhanaa
shaal o.Dhe huye bhiigataa kaun hai

mai.n yahaa.N dhuup me.n tap rahaa huu.N magar
vo pasiine me.n Duubaa kaun hai

aasamaano.n ko hamane bataayaa nahii.n
Duubatii shaam me.n Duubataa kaun hai

Khushbuuo.n me.n nahaa_ii huyii shaaKh par
phuul saa muskuraataa huaa kaun hai

dil ko patthar huye ik zamaanaa huaa
ham makaa.N me.n magar bolataa kaun hai


____________________________________________________________________________________________________________________________

ko_ii kaa.NTaa chubhaa nahii.n hotaa
Bashir Badr



ko_ii kaa.NTaa chubhaa nahii.n hotaa
dil agar phuul saa nahii.n hotaa

kuchh to majabuuriyaa.N rahii ho.ngii
yuu.N ko_ii bevafaa nahii.n hotaa

guftaguu un se roz hotii hai
muddato.n saamanaa nahii.n hotaa

jii bahut chaahataa sach bole.n
kyaa kare,n hausalaa nahii.n hotaa

raat kaa i.ntazaar kaun kare
aaj kal din me.n kyaa nahii.n hotaa

____________________________________________________________________________________________________________________________

kuchh to mai.n bhii bahut dil kaa kamazor huu.N
Bashir Badr


kuchh to mai.n bhii bahut dil kaa kamazor huu.N
kuchh muhabbat bhii hai fitaratan badagumaa.N

tazakaraa ko_ii ho zikr teraa rahaa
avval-e-aaKhirash daramiyaa.N daramiyaa.N

jaane kis desh se dil me.n aa jaate hai.n
chaa.Ndanii raat me.n dard ke kaaravaa.N

____________________________________________________________________________________________________________________________


log TuuT jaate hai.n ek ghar banaane me.n
Bashir Badr



log TuuT jaate hai.n ek ghar banaane me.n
tum taras nahii.n khaate bastiyaa.N jalaane me.n
aur jaam TuuTe.nge is sharaab-Khaane me.n
mausamo.n ke aane me.n mausamo.n ke jaane me.n
har dha.Dakate patthar ko log dil samajhate hai.n
umr biit jaatii hai dil ko dil banaane me.n
faaKhtaa kii majabuurii ye bhii kah nahii.n sakatii
kaun saa.Np rakhataa hai usake aashiyaane me.n
duusarii ko_ii la.Dakii zindagii me.n aayegii
kitanii der lagatii hai usako bhuul jaane me.n

____________________________________________________________________________________________________________________________

maan mausam kaa kahaa, chhaa_ii ghaTaa, jaam uThaa
Bashir Badr



maan mausam kaa kahaa, chhaa_ii ghaTaa, jaam uThaa
aag se aag bujhaa, phuul khilaa, jaam uThaa
pii mere yaar tujhe apanii qasam detaa huu.N
bhuul jaa shikavaa-gilaa, haath milaa, jaam uThaa
haath me.n jaam jahaa.N aayaa muqaddar chamakaa
sab badal jaayegaa qismat kaa likhaa jaam uThaa

ek pal bhii kabhii ho jaataa hai sadiyo.n jaisaa
der kyaa karanaa yahaa.N, haath ba.Daa, jaam uThaa
pyaar hii pyaar hai sab log baraabar hai.n yahaa.N
maikade me.n ko_ii chhoTaa na ba.Daa, jaam uThaa

____________________________________________________________________________________________________________________________

mai.n bhii shaayad buraa nahii.n hotaa
Bashir Badr


mai.n bhii shaayad buraa nahii.n hotaa
vo agar bevafaa nahii.n hotaa

bevafaa bevafaa nahii.n hotaa
Khatm ye faasalaa nahii.n hotaa

kuchh to majabuuriyaa.N rahii ho.ngii
yuu.N ko_ii bevafaa nahii.n hotaa

jii bahut chaahataa hai sach bole.n
kyaa kare.n hausalaa nahii.n hotaa

raat kaa i.ntazaar kaun kare
aaj-kal din me.n kyaa nahii.n hotaa

guftaguu un se roz hotii hai
muddato.n saamanaa nahii.n hotaa



____________________________________________________________________________________________________________________________


mil bhii jaate hai.n to kataraa ke nikal jaate hai.n
Bashir Badr



mil bhii jaate hai.n to kataraa ke nikal jaate hai.n
haaye mausam kii tarah dost badal jaate hai.n
ham abhii tak hai.n giraftaar-e-muhabbat yaaro
Thokare.n khaa ke sunaa thaa ki sambhal jaate hai.n
ye kabhii apanii jafaa par na huaa sharmindaa
ham samajhate rahe patthar bhii pighal jaate hai.n
umr bhar jin kii vafaao.n pe bharosaa kiije
vaqt pa.Dane pe vahii log badal jaate hai.n


____________________________________________________________________________________________________________________________

mere saath tum ye duaa karo yo.n kisii ke haq me.n buraa na ho
Bashir Badr



mere saath tum bhii duaa karo yuu.N kisii ke haq me.n buraa na ho
kahii.n aur ho na ye haadasaa ko_ii raaste me.n judaa na ho
mere ghar se raat kii sej tak vo ik aa.Nsuu kii lakiir hai
zaraa ba.D ke chaa.Nd se puuchhanaa vo isii taraf se gayaa na ho
NOTE: Some books have the first misra of the above sher as:
merii chhat se raat kii subah tak ko_ii aa.Nsuuo.n kii lakiir hai

sar-e-shaam Thaharii hu_ii zamii.n, aasamaa.N hai jhukaa huaa
isii mo.D par mere vaaste vo charaaG le kar kha.Daa na ho
vo farishte aap hii Dhuu.NDhiye kahaaniyo.n kii kitaab me.n
jo buraa kahe.n na buraa sune ko_ii shaKhs un se Khafaa na ho
vo visaal ho ke firaaq ho terii aag mahakegii ek din
vo gulaab ban ke khilegaa kyaa jo charaaG ban ke jalaa na ho
mujhe yuu.N lagaa ki Khaamosh Khushbuu ke ho.NTh titalii ne chhuu liye
i.nhii.n zard patto.n kii oT me.n ko_ii phuul soyaa huaa na ho
isii ehatiyaat me.n mai.n rahaa, isii ehatiyaat me.n vo rahaa
vo kahaa.N kahaa.N mere saath hai kisii aur ko ye pataa na ho

____________________________________________________________________________________________________________________________